Saturday, August 7, 2010

LIHAM NG PAG-IBIG

Una pa lamang kitang nakita, nabighani na ako sa iyong kakisigan. MAHAL na kita sa una nating pagkikita. Kahit na may kaitiman ka, napakaganda pa ring pagmasdan ang balat mong napakakinis. Napakaganda ng iyong mukha. Akala ko pa nga ay napakahirap mong abutin, pero sinabi ko sa sarili ko na gagawin ko ang lahat mapasaakin ka lamang. Ginugol ko ang aking mga oras sa kakaisip ng mga paraan na maglalapit sa ating dalawa. Minsan ginagawa kong araw ang gabi upang mapatunayan sa iyo ang aking pagmamahal, nagtrabaho akong mabuti upang makaipon, para rin sa iyo. At nuon ngang ika-4 ng Agosto 2010, ipinaubaya mo ang iyong sarili sa akin.

Minahal kita ng lubusan. Lagi kitang pinakikinggan. Hindi tayo mapaghiwalay. Kahit sa pagtulog lagi tayong magkatabi at magkaulayaw, pasensya na kung minsan ikaw ay aking natutulugan. Ang mga barkada ko nga ay naiinis na sa akin dahil ikaw lang daw ang aking pinakikinggan. Ikaw ang laging kasama mula bukangliwayway hanggang takipsilim.

Dahil sa aking pagmamahal sa iyo, ako ang nagaaruga sa iyo na iyo namang ikinatutuwa. At ikaw naman, laging dala dala ang ating mga larawan upang ipaalala ang ating pinagsamahan. Kung nababagot naman ako ay nagyayaya kang manood ng sine. Higit sa lahat minahal kita, kahit na minsan ay pinaglalaruan kita, naiintindihan mo naman ang dahilan kung bakit ganun ako sa iyo. Alam ko minsan nasasaktan ka na sa mga papindot pindot ko sa iyo, pagkurot kurot ko sa iyo. Dahil dooy hindi mo maiwasang maubusan ng lakas na animoy tuluyan mo na akong iiwan. Ngunit matapos ang ilang oras ay bumabalik ka rin kagad sa aking mga PALAD.

Ang mga musikang hatid mo ang siyang nagpapawi ng aking lumbay at lungkot kaya naman tatagal ang ating pagsasama. Alam kong marami pa tayong pagdadaanan, lalo pa’t nalalapit na ang ating pag-uwi sa Pilipinas. Baka pagnakita ka ng aking mga kapatid ay hingin ka sa akin. Hindi ka naman siguro magagalit kung ipapahiram kita diba? Sasabihan ko naman sa kanila na ingatan ka dahil NAPAKAMAHAL mo. Basta ipinapangako kong hindi ka masisira dahil malaking kawalan ka sa akin. Kahit medyo marami ka nang gasgas the best ka parin para sa akin. Nandito lagi ako para sa iyo aking PSP (PLAYSTATION PORTABLE).


Nagmamahal,

ULAP


PS. Ireregalo nga pala kita sa aking inaanak

2 comments:

  1. Putang ina mo, huwag kang magpakamtay para sa PSP.

    ReplyDelete